Satoe Harian Sintjhia Satenga Abad Jang Silem
Budaya-Tionghoa.Net| "Kionghie, Sintjoen kionghie!" ini utjapan ada kadengeran di mana-mana. Bebrapa orang tua membilang "Sin Tjoen Kiong Hie Thiam Hok Thiam Sioe!", sedeng kita, anak-anak tjuma berebut tudjukan kitapunja tangan jang dikepel lalu dirangkep di depan dada sambil manggut-manggut utjapken itu kata-kata keramat ke hadapan orang-orang tua. Ja, betul keramat, kerna biasanja sasudah lakukan itu lalu ada uwang djatoh dari 'atas'. Belon tentu pake emplop merah, malahan sering langsung 'mentahan' sahadja ... (dimuat dalam katalog Pasar Imlek Semawis 2006) Ada baek kalu disini dikasi tau artinja itu perkatahan, 'kiong hie' ada satu salam buat membri slamet, 'sin tjoen' ada punja artian musin semi jang baru, sedeng 'thiam hok thiam sioe' sama dengen tambah banjak redjeki, tambah pandjang umur. Ini utjapan salam ada menggenggem arti jang dalem dan alus. Ini hari kitaorang sama-sama merajahken datengnja musin semi, peritungan taon jang baru berbarengan sama harepan supaja kitaorang beramai dapetken redjeki lebihan, djuga usia jang lebi pandjang.
|
||||
Itu hari kitaorang anak-anak, sudah kudu bangun tidur pagi-pagi, lalu buru-buru mandi dan bersihkan badan. Sehabis mandi, lantas badan digosok sama bedak talk. Wah, badan djadi wangi, padahal di hari biasa bau ketjutnja keringet ketjampur sama sengaknja bau kaki dalem itu sepatu kulit zonder kaos kaki!
Badju jang sudah bebrapa minggu sebelonnja dibikin, didjait sama koh (ade prampuannja papah), djadi kita anak-anak semua meliat dari deket dibikinnja itu badju, mulai dari lembaran kain warna puti jang dibeli di kota besar, lalu patroon jang digambar menurut kitapunja ukuran badan masing-masing, lantas terachir dipotong pake gunting besar (ja, kita, seekhia likhiat atau anak ketjil jang nakal tida boleh sentuh itu barang!).
Sasudanja dipotong-potong lalu didjahit kombali djadi badju ketjil-ketjil. Saben sore koh duduk di bawah lampu membikin bordir atas bagian depan itu badju putih. Pertama-tama kita semua tida tau mau dibikin apa badju jang suda bagus dibikin itu. Kita liat tinggal pasang kantjing kan suda djadi, kenapa mesti ditjoret-tjoret lalu diiket pake gelangan kaju bunder dan tiap sore dipangku sama koh. Lewat bebrapa hari baru keliatan kalu itu ada gambarnja satu ajam hutan jang bagus sekali! Kita tiga sudara lelaki semua dapet satu badju sematjem itu! Tiga hari sebelon sintjhia, kita suda ribut omongkan itu badju.
Hari ini badju itu dipake! Wah, sunggu bangga sekali memake itu badju dengen borduur ajam hutan jang warna-warna. Ada badannja jang biru, sajap dan buntutnja kuning sama oranje, tjenggernja jang merah, wah rasanja betul tiada lagi badju lebi bagus dari itu di ini dunia! Kita tau betul kerna di sekolahan, anak-anak semua suda tau apa jang aken dipake di harian taon baru ini. Tjelana pendek djuga baru, warnanja biru gelap, lalu kaos kaki, jang baru sekalian, putih pake streep biru di bagean atasnja. Sepatu djelas mengkilap dan baru dipake itu pagi. Ini sepatu djuga dipesen dari toko sepatu jang terkenal di kota.
Dari kamar kita dengen tertip kita bertiga sudara, berbaris ke luar, ke pertengahan, di mana ada kedapetan satu kongpo atawa medja sembajang jang besar buat taro gambarnja kongtjo, maktjo, ngkong sama mak dari fihak papah, jaitu jang sambungkan kitapunja she (marga). Sudah tentu, jang pertama kita hundjuk pay pada papah lalu mamah, jang itu waktu sudah berpakean rapi (tentu baru djuga!). Papah memake pantaloon wol abu-abu dan badju putih tangan pandjang, keliatan sedeng gagahnja, sedeng mamah memake terusan dari brokat warna oranje dengen plisir atawa pelipit merah sama kuning. Rambutnja disanggul ke atas dan dipakekan tusuk sanggul mas jang pake inten barliant ketjil-ketjil.
Habis itu kita bertiga keliling menghaturkan pay (paytjhia) kepada semua jang ada di itu ruangan, semua tjekkong, tjimpoo, mpek, wak, ntjek, ntjim, koh, kohthio. Ini semua ada paytjhia jang paling ber'harga'. Betul-betul berharga besar! Itu semua ade-adenja ngkong, ngko dan adenja papah, semua mengasih angpauw atawa bungkusan merah! Urutan selandjutnja 'kurang' menarik, jaitu deretan ngkoh dan entji piauw jang tjuma membales pay sambil mesem simpul zonder pauw! Sudah jang idup, baru kita haturkan hormat kepada jang suda di atas kongpo, kita dibagi tiga batang hio masing-masing. Pertama tiga-tiga dihaturkan ke langit, madep keluar, memblakangin kongpo. Dua lagi dihaturkan ke kongpo.
Di atasannja medja ada tertata rapi derekan piring dan mangkok dengen segala matjem masakan, saperti tja rebung bambu, sambel goreng rempelo ati, kuah sajur asin, babi masak tjin, masak oh, sate ati dan sebaginja. Dari derekan kueh-kueh kaliatan gundukan wadjik, tjitak, kueh mangkok, tape ketan. Misih ada bebuahan saperti djeruk gulung, djeruk patjitan, pisang radja, lengkeng, sedeng di kaki medja bagian depan diiket batang tebu, compleet dengen daon-daonnja. Semuanja dirias dengen kertas klobot (crepes) warna djambon, bukannja merah!
Satelah 'tugas' itu slese, anak-anak masi blon bebas, kitaorang kudu duduk baek-baek mengawaskan itu kumpulan orang tua pasang omong. Memang ini kurang menjenengken kitaorang, tapi kudu diturut kalu mau 'tjari redjeki' lagi. Kira djam setenga sepuluh, kita bertiga mengiringkan papah dan mamah menudju ke rumahnja gwakong atawa papahnja mamah, mertuanja papah. Kerna rumah engkong ini tjuma sakiter 200 meter, maka kita tjukup djalan kaki sahadja. Kendati tidak sampe seprapat kilometer, perdjalanan ini makan waktu lumajan lama kerna di djalan, selalu bersomplokan sama temen-temennja papah sama mamah. Marika lalu bertukar pay, salam dan senjum. Nah kitaorang jang di buntut, tjuma ikut-ikut manggut-manggut dan hafalkan semua jang ketulis di baris paling atas tulisan ini.
Sampe di rumahnja engkong, ja, kerna practisch kita tjuma alamkan satu engkong ini, disini ada lebih rame kerna sudara-sudara piauw (sepupu) di sisih sini lebi banjak jang umurnja sepantaran. Urutan atjara disini sama sadja, tjuma jang diadepin urutannja mulai dari engkong dan emak, lalu engku dan engkim, ie-ie dan ie-thio. Begitu slese sembajang, kita lalu maen sama sudara-sudara piauw sampe achirnja engkong kupingnja djadi pengang lalu anak-anak digebah ke kebon blakang. Wah ini malahan djadi kebetulan, kita lari-larian menabrak segala jang didjalan sampe emak jang biasanja lembut itu kepaksa mengelah napas ...
Keramean baru kurangan sasuda orang tua kumpul di medja makan buat bersantap siang. Kita anak-anak sambil makan, tapi gujon tida dibrentikan, malah jang bengal tetap lari-larian sampe kudu dibentak-bentak papah atawa mamahnja, diperkuat engkong, baru bisa diem. Santapan ja hidangan jang tadi ditaro di atas medja sembajang itu.
Abis makan, kita baru pulang, tjuma djalan pulangnja mutar, kerna papah masi mau haturkan pay ke kongponja kongtjouw dari fihak emak. Sambil djalan di panasnja matahari dan asphalt, kita anak-anak jang suda mulai kehabisan tenaga dan kagumbirahan saperti menjeret setiap langkah kita. Apalagi itu sepatu baru mulai menundjukkan kebengisannja, jaitu menghasilkan letjet-letjet jang semingkinan perih dirasaken. Aneh, anak djeman sekarang kenapa tida perna letjet lagi pake sepatu baru ja?
Hiang Phek Tauwtoo
Budaya-Tionghoa.Net| Mailing List Budaya Tionghua 55409
Didi Kwartanada
Xuan Tong